Xotinlarini ajratishga ulgurmay hushidan ketdi: Misr terma jamoasi bosh murabbiyi OAVdan chetlatildi
Oilaviy janjal Misr terma jamoasi murabbiyi Hossam Hassanga nisbatan media taqiqi joriy etilishiga sabab boʻldi. Mamlakat OAVni tartibga solish boʻyicha Oliy kengashi 60 yoshli murabbiyni barcha platformalardan chetlatdi. Yozda uning xotinlari mol-mulkni boʻlib olish masalasida kelisha olmay, mushtlashib ketgan, oʻshanda Hassan hushidan ketgan edi.
Misr terma jamoasi bosh murabbiyi Hossam Hassan endi mamlakatdagi hech bir media platformasida koʻrinish bera olmaydi. Bunday qarorni Misr OAVni tartibga solish boʻyicha Oliy kengashi (SCMR) rasman qabul qildi. Kengash bu qarorni OAV auditoriyani maʼrifatlantirishi kerakligi va shaxsiy hisob-kitoblarni hal qilish maydoniga aylanmasligi lozimligi bilan izohladi.
Bunga yozda yuz bergan mojaro sabab boʻldi. Oʻshanda Hassanning ikki xotini mol-mulkni taqsimlash masalasida janjallashib, mushtlashib ketgan, murabbiyning oʻzi esa mojaro vaqtida hushidan ketgan.
Al Jazeera xabariga koʻra, taqiq milliy terma jamoa matbuot anjumanlariga taalluqli emas, shu bois mutaxassis u yerda chiqish qilishda davom etadi. Yaqinda 60 yoshli Hassan terma jamoa bilan shartnomasini 2030 yilgacha uzaytirgan edi.
