Martines «Manchester Yunayted» rahbariyatini yetarli sarmoya kiritmagani uchun tanqid qildi
Klub himoyachisi Lisandro Martines Amazon Primeʼga bergan intervyusida «Manchester Yunayted» oʻtgan yili Premyer-ligada uchinchi oʻrinni egallaganidan keyin tarkibga koʻproq sarmoya kiritilishini kutganini aytdi.
«Manchester Yunayted» Chempionlar ligasi doirasidagi oʻyinda «Atletiko Madrid»ga 0:2 hisobida yutqazdi va barcha turnirlarda ketma-ket beshta uchrashuvdan beri gʻalaba qozona olmayapti.
Martines jamoa oʻyinini «haqiqatan ham zaif» deb atadi va natija klubning hozirgi holatini aks ettirishini taʼkidladi. Uning soʻzlariga koʻra, jamoa kuchli tarkib uchun poydevor yaratgan oʻtgan mavsumdan keyin rahbariyat bu ishni davom ettirmagan.
Himoyachi bosh murabbiy Maykl Kerrikni ishdan boʻshatish gʻoyasiga ham qarshi chiqdi: «Murabbiylarni doimiy ravishda almashtirib boʻlmaydi. Boshqa sohalarga ham eʼtibor qaratish kerak». Klub egasi Jim Retkliff Madridda boʻlib oʻtgan oʻyinda qatnashdi.
Yozda «Manchester Yunayted» yarim himoyachilar transferiga qariyb 140 million funt sarfladi, biroq muxlislar boshqa pozitsiyalar, jumladan, chap qanot himoyachisi va hujumchi kuchaytirilishini kutgandi. Kerrik uchrashuvdan keyingi hissiyotlar sabab Martinesning soʻzlarini izohlashdan bosh tortdi.
Klubning sobiq hujumchisi Ueyn Runi Martinesning tanqidini haddan tashqari deb atadi va bunday bayonotlar himoyachining tarkibdagi oʻrnidan ayrilishiga sabab boʻlishi mumkinligini taxmin qildi.
