Chernogoriyada 18 nafar oʻzbekistonlik bokschi jahon oltini uchun kurashadi
Turnirda 500 nafardan ortiq sportchi ishtirok etadi, Oʻzbekiston sharafini esa erkaklar va ayollar terma jamoalaridan 18 nafar bokschi himoya qiladi.
Chernogoriyaning Budva shahrida 19 yoshgacha boʻlgan sportchilar oʻrtasida boks boʻyicha jahon chempionati boshlanadi. Birinchi kun dasturidan tantanali ochilish marosimi, qurʼa tashlash jarayoni hamda musobaqa texnik qoʻmitasining yigʻilishi oʻrin olgan.
Turnir medallari uchun sayyoramizning qariyb 80 davlatidan kelgan 500 nafardan ortiq bokschi kurashadi. Oʻzbekiston yoshlar terma jamoasi tarkibidan 18 nafar sportchi joy oldi: 10 nafar oʻgʻil bola va 8 nafar qiz.
Erkaklar vazn toifalarida mamlakat sharafini Amirjon Suponov (50 kg gacha), Elyor Rustamov (55 kg gacha), Muhammad Rizo Ukimov (60 kg gacha), Jahongir Zayniddinov (65 kg gacha), Zulfiqor Adhamjonov (70 kg gacha), Suxrob Rahmatullayev (75 kg gacha), Abrorbek Sharipov (80 kg gacha), Sardorbek Bahromxoʻjayev (85 kg gacha), Asadbek Sultonboyev (90 kg gacha) va Islom Salihov (90 kg dan yuqori) himoya qiladi.
Ayollar oʻrtasidagi bahslarda esa medallar uchun Muxtasar Aliyeva (48 kg gacha), Nazokat Mardonova (51 kg gacha), Shodiyona Melikuzieva (54 kg gacha), Robiya Ravshanova (57 kg gacha), Sevara Mamatova (60 kg gacha), Aselya Tulegenova (65 kg gacha), Maftuna Yangiyeva (70 kg gacha) va Samira Turgunova (75 kg gacha) bellashadi.
Jadvalga koʻra, dastlabki va chorak final janglari 16–24 oktabr kunlari oʻtkaziladi. Yarim final bahslari 25 oktabrga, unvonlar uchun hal qiluvchi janglar esa 27 oktabrga rejalashtirilgan.
