Makdevid NHL toʻpurarlar poygasida peshqadamlikni saqlab qoldi, Kaprizov — toʻrtinchi
NHLda «Yuta» «Edmonton»ni 4:2 hisobida magʻlub etdi, «Vegas» «Kalgari»ni 6:2 hisobida tor-mor qildi, «Minnesota» esa «Sent-Luis» ustidan 5:4 hisobida gʻalaba qozondi.
«Edmonton Oilers» sardori Konor Makdevid NHL muntazam chempionatining «Yuta»ga qarshi uchrashuvida golli uzatmani amalga oshirdi. Oʻyin uning jamoasi 2:4 hisobida magʻlub boʻlishi bilan yakunlandi.
Ushbu assist tufayli 29 yoshli kanadalik liga eng yaxshi toʻpurarlari roʻyxatidagi birinchi oʻrnini saqlab qoldi. Endilikda uning hisobida 7 ta oʻtkazilgan uchrashuvdan keyin 18 ochko bor (4 ta gol + 14 ta uzatma).
Ikkinchi oʻringa «Vegas Golden Knights» hujumchisi Jek Aykel koʻtarildi. U bugun «Kalgari»ga qarshi oʻyinda (6:2) 3 ochko jamgʻardi (1+2). Endilikda 29 yoshli amerikalikning 9 ta uchrashuvdagi ochkolari soni 16 taga yetdi (5+11).
Uchinchi oʻrinda «Oilers» himoyachisi Evan Bushar bormoqda. U ham bugun «Yuta»ga qarshi uchrashuvda golli uzatmani amalga oshirdi. 26 yoshli kanadalik 7 ta oʻyinda 15 ochko toʻplagan (6+9).
«Minnesota» hujumchisi Kirill Kaprizov yakka oʻzi toʻrtinchi oʻringa chiqdi. U «Sent-Luis»ga qarshi bahsda (5:4) 3 ochko qayd etdi (1+2). 29 yoshli hujumchi 8 ta uchrashuvda 14 ochko jamgʻargan (9+5) va ayni paytda chempionatning eng yaxshi snayperi hisoblanadi.
