Mitchell faoliyatini «Klivlend»da yakunlashni rejalashtirmoqda: «Oʻzimni boshqa jamoada koʻrmayman»
U, shuningdek, bir kun kelib klub arenasining gumbazi ostida oʻzining 45-raqami osilganini koʻrishni orzu qilishini tan oldi.
«Kavalyers» yetakchisi Donovan Mitchell bundan keyingi faoliyatini faqat Klivlend bilan bogʻlashini aytdi. U hozircha oʻzini boshqa klub formasida tasavvur qila olmaydi, asosiy vazifa esa amaldagi tarkib bilan chempionlikni qoʻlga kiritish ekanini taʼkidladi.
Cleveland.com jurnalisti Kris Fedor bilan suhbatda basketbolchi ligaga realistik qarashini bildirdi: «Bu biznes, menda xomxayollar yoʻq. Agar jamoa chempionlik uchun kurashdan chiqib qolsa, qarorlarni qayta koʻrib chiqishga toʻgʻri keladi. Ammo oʻzimni boshqa jamoa libosida tasavvur qila olmayman».
Mitchell «Klivlend»ga 2022/23-yilgi mavsum arafasida «Yuta»dan almashinuv orqali kelgan. Yozda 30 yoshli himoyachi 273 million dollarlik yangi toʻrt yillik shartnoma boʻyicha kelishib oldi va buning natijasida mumkin boʻlgan maksimal shartlarga erishdi.
Mitchellning soʻzlariga koʻra, kelishuvni imzolash klubda uzoq muddat ishlash niyatini anglatadi. «Men natijaga erishish uchun shu yerda qolayapman va buning uchun barchamiz javob berishimiz kerak. Shartnoma chempionlik uzugini kafolatlamaydi, ammo biz aynan shu maqsad sari ketyapmiz. Men har kuni shu fikr bilan ish boshlayman», — dedi u.
