«Abadiy bizning sardorimiz»: Portugaliya futbol federatsiyasi rahbari Ronaldoga murojaat qildi
Portugaliya futbol federatsiyasi prezidenti Pedro Proensa Krishtianu Ronalduning milliy terma jamoadagi faoliyatini yakunlash haqidagi qarori yuzasidan fikr bildirdi.
41 yoshli hujumchi bugun terma jamoadan ketishini eʼlon qildi. U Portugaliya safida 23 yil davomida maydonga tushdi.
Proensaning aytishicha, Ronaldu mamlakat uchun har doim oddiy futbolchidan koʻra koʻproq narsani anglatadi.
«Inson, sportchi, ibrat namunasi, qahramon, yetakchi. Bizning sardorimiz», — deya taʼkidladi federatsiya rahbari.
Proensa federatsiya va butun Portugaliya futboli nomidan Krishtianuga minnatdorlik bildirdi. Uning taʼkidlashicha, hujumchining qadri gʻalabalar, sovrinlar va rekordlar, shuningdek, tarixdagi eng mashhur futbolchi hamda terma jamoaning eng yaxshi toʻpurari maqomi bilangina cheklanmaydi. Uning fikricha, eng muhimi — Ronaldu oʻrnak va ilhom manbaiga aylandi: aynan u Portugaliyani jahon maydoniga olib chiqdi, bugun esa mamlakat haqida qayerda gapirilmasin, albatta uning nomi tilga olinadi.
Bundan tashqari, Proensa futbolchiga soʻnggi bir yarim yil davomida koʻrsatgan koʻmagi, muloqoti va yaqin munosabati uchun shaxsan minnatdorlik bildirdi. «Portugaliya futbol federatsiyasining eshiklari Krishtianu Ronaldu uchun har doim ochiq boʻladi. Barchasi va hatto undan ham koʻprogʻi uchun rahmat. Abadiy bizning sardorimiz», — deya federatsiya prezidenti soʻzlarini yakunladi.
