Shefer NHL tarixida butun qoʻshimcha vaqtni oʻtkazgan birinchi oʻyinchi boʻldi
«Nyu-York Aylanders»ning 19 yoshli himoyachisi Metyu Shefer «Neshvill»ga qarshi safar oʻyinida qoʻshimcha vaqtning barcha besh daqiqasini almashtirilmasdan muz ustida oʻtkazdi.
Mehmonlar bullitlar seriyasida 4:3 hisobida gʻalaba qozondi, kanadalik xokkeychi esa shu vaqt ichida raqib xokkeychisining chetlatilishiga ham sabab boʻldi.
NHL maʼlumotiga koʻra, liga har bir oʻyinchining muz ustidagi har bir smenasi davomiyligini real vaqt rejimida qayd eta boshlagan 2009/10-yilgi mavsumdan beri bunday holat kuzatilmagan. «Aylanders» xokkeychilari uchun esa bu oʻsha davrdagi eng uzoq smena boʻldi.
Umuman, Shefer muz ustida 32 daqiqa 16 soniya oʻtkazdi. Bu uning NHLdagi shaxsiy rekordi. Bundan tashqari, u hisobni 3:0ga yetkazgan Bo Xorvatga golli uzatma berdi. Keyinroq «Neshvill» hisobni tenglashtirdi, uchrashuv taqdirini esa Kayl Palmiyerining bulliti hal qildi.
Joriy mavsumda Shefer 12 ta uchrashuvda 11 ochko (2+9) jamgʻargan, uning foydalilik koʻrsatkichi «+1», har bir oʻyinda muz ustida oʻtkazgan oʻrtacha vaqti esa 26:43 ni tashkil etmoqda.
