«Minnesota» yetakchisi Entoni Edvards jarohati sabab ikki oygacha oʻynamaydi
Edvards jarohatlangan oʻng tizzasidan artroskopik operatsiya qilinadi, shundan soʻng u ikki oygacha maydonga tusha olmaydi.
Bu xabar himoyachining yorqin oʻyinidan bir kun oʻtib paydo boʻldi. 27-oktabr kuni Edvards 41 daqiqa parketda boʻlib, 47 ochko jamgʻardi va «Minnesota»ning eng sermahsul oʻyinchisiga aylandi. Biroq uning jamoasi qoʻshimcha vaqtda «Klivlend Kavalyers»ga 125:127 hisobida yutqazdi.
Joriy mavsumda 25 yoshli basketbolchi toʻrtta uchrashuvda maydonga tushib, har bir oʻyinda oʻrtacha 33,3 ochko, 4,8 ribaund va 3,5 ta assist qayd etdi. Tizza bilan bogʻliq muammolar Edvardsni oʻtgan mavsumda ham qiynagan: uning aytishicha, oʻshanda u qariyb ikki oy oʻynamagan.
«Minnesota» oʻzining asosiy oʻyinchisisiz navbatdagi uchrashuvni oʻtkazadi: 29-oktabr kuni «Timbervulvz» oʻz maydonida «Golden State Warriors»ni qabul qiladi.
