Yemelyanenko nega UFC bilan shartnoma imzolamaganini tushuntirdi
Fyodor Yemelyanenko UFCʼga amalga oshmagan oʻtishi tafsilotlari bilan oʻrtoqlashdi. Dana Uayt bilan asosiy muzokaralar rossiyalik jangchining Strikeforceʼda Brett Rodjers ustidan qozongan gʻalabasidan keyin boʻlib oʻtgan.
Jangchining aytishicha, UFC rahbari uchrashuvda unga juda katta qiziqish bildirgan. Biroq Yemelyanenkoni shunisi oʻylantirib qoʻyganki, yaqindagina, u hali hech qaysi liga oldida majburiyatga ega boʻlmagan paytda, unga hech qanday taklif berilmagan edi. U bunday holat oʻzida doim takrorlanganini taʼkidladi: promouterlarning qiziqishi faqat u shartnoma bilan bogʻlangan paytda uygʻongan.
Asosiy toʻsiq aynan Strikeforce bilan tuzilgan shartnoma boʻlgan. Ligani tark etish muqarrar ravishda sud jarayoniga olib kelar, jarayon davomida esa Yemelyanko Amerikada jang qilish huquqidan mahrum boʻlardi. Fyodor Uayt va uning yuristlari bilan uchrashuvga faqat menejeri Vadim Finkelshteynning iltimosidan keyin borgan. Uning oʻzi UFC uni qoʻlga kiritishga emas, balki raqobatchi kuch sifatida zararsizlantirishga — umuman janglarsiz qoldirishga intilganiga ishonadi.
Rossiyalik jangchi Uaytni industriya afsonasi sifatida eʼtirof etmadi. U sport rasmiysini voqealar haqidagi talqinini doim oʻzgartirishi va vaʼdasida turmasligi uchun tanqid qildi hamda bunday biznes yuritish uslubi unga begona ekanini tan oldi.
