Nadalni «Real Madrid» direktorlar kengashi aʼzosi etib tasdiqlash taklif qilindi
«Real Madrid» direktorlar kengashi Rafael Nadalni kengashning yangi aʼzosi etib tasdiqlash masalasini delegatlar yigʻilishiga kiritishga qaror qildi. Yigʻilish sanasi koʻrsatilmagan.
Madridning «Real Madrid» klubi direktorlar kengashi 4 noyabr kuni dunyo reytingida birinchi oʻrinda boʻlgan sobiq tennischi Rafael Nadalni tayinlash masalasini delegatlarning umumiy yigʻilishi koʻrib chiqishiga kiritishni taklif qildi. Qaror hali yigʻilish tomonidan maʼqullanishi kerak, shu sababli tennischi hozircha klub direktorlar kengashiga kirmadi.
Nadal «Real Madrid»ning 67 778-raqamli sosiusi boʻlib, klub faxriy aʼzosi maqomiga ega. Uni tayinlash masalasi 4 noyabr kuni boʻlib oʻtgan direktorlar kengashi yigʻilishida qabul qilindi.
«Real Madrid» bayonotida Nadal sport tarixidagi eng buyuk afsonalardan biri, shuningdek, dunyodagi eng hurmat qilinadigan va eng taniqli ispaniyalik sportchilardan biri deb ataldi. Klub tennischining direktorlar kengashiga qoʻshilishi mumkinligini katta sharaf deb bilishini va uning jamoaning buguni hamda kelajagiga qoʻshadigan hissasiga umid qilayotganini taʼkidladi.
Nadal faoliyati davomida 92 ta yakkalik chempionligini, jumladan, «Katta dubulgʻa» turkumidagi 22 ta turnirni qoʻlga kiritgan. U ikki marta Olimpiya chempioni boʻlgan, Ispaniya terma jamoasi tarkibida Devis kubogida besh marta gʻalaba qozongan va jahon reytingida birinchi oʻrinni egallagan.
Shu bilan birga, «Real Madrid»da Nadalning klub uchun ahamiyati faqat sportdagi natijalari bilan cheklanmasligi taʼkidlandi. Jamoa uning fazilatlari qatorida isteʼdod, doimiy rivojlanishga intilish, maqsad yoʻlida oʻzini fido qilishga tayyorlik, raqobat ruhi, kamtarlik, raqiblar va hamkorlarga hurmat, shuningdek, birdamlikni qayd etdi.
Klub bahosiga koʻra, bu fazilatlar «Real Madrid» qadriyatlariga mos keladi. Bayonotda qayd etilishicha, Nadal butun faoliyati davomida ularni namoyon etgan va kortda ham, undan tashqarida ham butun dunyodagi millionlab insonlar uchun namuna boʻlgan.
